Miércoles oúvape oñepyrũta ojepaga sueldo ha aguinaldo 668.000 tapichakuérape

 Agencia IP.- Ministerio de Economía y Finanzas (MEF) he’i kuri miércoles 11 de diciembre-pe oñepyrũta umi págo ary paha rehegua, ha’éva salario, aguinaldo, jubilación ha pensión. Upéicha, oñemovirume’ẽta USD 567 millón 668.000 tapichápe g̃uarã.

Viceministro Administración Financiera MEF rehegua, Oscar Lovera, omombe’u umi págo oñepyrũta ojejapo 11 de diciembre guive. Upe ára okobráta hína umi veterano ha adulto mayor, hakatu 12 guive 17 peve ojepagáta salario ha aguinaldo umi funcionario público-pe g̃uarã.

Mba’e ára pa okobráta káda institución odependéta araka’épa ohechauka hikuái opavave kuatia oñeikotevẽva, he’i viceministro.

Umi págo ojejapopáta 18 de diciembre-pe jubilado Caja Fiscal ndive. Ary ohasava’ekuépe ojepaga kuri hese opaichagua árape, ha ko arýpe okobráta hikuái ijubilación ha gratificación oñondive upe árape voi.

Viceministro omombe’u avei umi beneficiario apytépe oĩ 76.000 funcionario administrativo, haimete 50.000 tapicha omba’apóva Fuerza Pública-pe, hetave 95.000 ha’e mbo’ehára, 52.750 mba’apohára tesãi rehegua, 75.000 jubilado ha 319.000 adulto mayor.

«Romba’apo hína oñondive umi organismo de seguridad kuéranti romombareteve hag̃ua ha roñangareko umi tenda cajero jerére, ikatu hag̃uaicha tapichakuéra oiko kyhyje’ỹre. Avei, roñemongeta kuri Banco Nacional de Fomento-ndi ojecarga porã hag̃ua viru umi cajero-pe, ani opyta oguereko’ỹ viru ko’ã ára oúvape», he’i viceministro.